बेटी म्हारी सयानी होगी,
ब्याव उण'रो करणो है।
डायजा रो सेमान लावणो,
जान-जीमण करणो है।।

खाली हाथ जावो मती, कीं तो रहम करो।
भीख मांगे बेटी रो बाप, म्हारी मदत करो।।

कुछ लोग हिकारत सूं देखे,
कोई दस-बीस रिपिया नेके।
मालदार रिवाज बणाया ऐड़ा,
अ'र गरीब ने मरणो है।।

इताक पया ऊं कई व्हैला, कीं तो और करो।
भीख मांगे बेटी रो बाप, म्हारी मदत करो।।

डायजो ब्याव में नइ देणो,
जान-जीमण रो हुकम कोनी।
बात नबी री मान लो थें सब,
सबने एक दिन मरणो है।।

चुप क्यूं हो थें मो'ली साब, ओ खुतबो तो करो।
भीख मांगे बेटी रो बाप, म्हारी मदत करो।।

ब्याव सगळा करे मसीत में,
बात घणी आ चोखी है।
गरीब-अमीर सब निभ जावे,
काम ऐड़ो करणो है।

हाथ फैलावतां काळजो फाटे, थें मेसूस करो।
भीख मांगे बेटी रो बाप, म्हारी मदत करो।